Два нови, но исклучително ретки несакани ефекти на вакцината против Ковид-19 се откриени во најголемата студија за безбедност на вакцините досега. Тоа е невролошко нарушување и воспаление на ‘рбетниот мозок.
Студијата на повеќе од 99 милиони луѓе од Австралија, Аргентина, Канада, Данска, Финска, Франција, Нов Зеланд и Шкотска потврди некои нови детали за вакцините за Ковид-19.
Како што пренесува „Гардијан“, тоа е најголемата студија направена досега во која е откриено дека има две нуспојави, невролошко нарушување и воспаление на ‘рбетниот мозок, но тие сепак се многу ретки, а придобивките од вакцината се уште далеку го надминуваат ризикот од компликации.
Истражувачите кои работат како дел од Глобалната мрежа за податоци за вакцини користеле анонимизирани електронски здравствени податоци за да ги споредат стапките на 13 мозочни, крвни и срцеви заболувања кај луѓето по примањето вакцина од Pfizer, Moderna или AstraZeneca со стапката што би се очекувала од тие состојби во населението пред пандемијата.
Студијата со високо ниво на точност ги потврди познатите врски меѓу mRNA вакцините (Pfizer и Moderna) и ретките несакани ефекти на миокардитис (воспаление на срцевиот мускул) и перикардитис (воспаление на тенката мембрана што го покрива срцето). Таа, исто така, го потврди синдромот Гилем-Бареов, во кој имунолошкиот систем ги напаѓа нервите и тромбозата на церебралните венски синуси (вид на згрутчување на крвта во мозокот) како ретки несакани ефекти поврзани со вакцината Astrazeneca.
Но, нов редок несакан ефект, акутен дисеминиран енцефаломиелитис, воспаление и оток во мозокот и ‘рбетниот мозок, исто така беше идентификуван во анализата на податоците како поврзан со вакцината Astrazeneca. Наодите беа објавени во меѓународното списание Vaccine.
Професорот Џим Батери, еден од лидерите на Глобалната мрежа за податоци за вакцини, рече дека откритието ги поттикнало истражувачите самостојно да го потврдат несаканиот ефект со завршување на второто истражување, овој пат анализирајќи посебен сет на податоци од 6,8 милиони Австралијци кои ја примиле вакцината AstraZeneca. Таа студија ја потврди претпоставката и откри уште една компликација, воспаление на ‘рбетниот мозок.
Тие нагласија дека никој не може да знае за ретки несакани ефекти додека вакцината не се тестира на милиони луѓе.
Истражувачите потврдија дека ризикот од миокардитис е сè уште многу поголем ако се заразиме со коронавирус отколку ако примиме вакцина против корона.
Како што е наведено, многу е важно да се има доверба во системот за откривање на проблемите и нивно решавање.